نصائح لكل بنت بخصوص العريس

لو جالك عريس متقوليش لحد من صحباتك الحاجات دي بتتنظروتتحسد وأنتي عارفه البنات عينيها وحشة وحسوده

لو واحدة من صحباتك جبتلك عريس إوعي تشوفيه أو توافقي عليه لوكان عدل وكويس كانت خدته هي

هتقولي طب حتى لو متجوزة أقولك طبعا لأنها هتبقي عاوزاكي تاخدي واحد أقل من المنيل على عينه جوزها

متفضحيش الدنيا أما يجيلك عريس وتقولى للعالم كله أصبري شوية لما تمسكيه كويس هتصيّحي لنفسك ع الفاضي وتتحسب عليكي خطوبة

في أول مقابله لو لاقيتيه بيبص ف ساعته ..قاعد مش على بعضه.. وشه إتخطف وبان عليه خيبة الأمل إعرفي إنك معجبتيهوش .. إسبقي إنتي وقولي إنك رافضاه متخليش واحد زي ده يقول أنه مش عاوزك

متزعليش عليه ولا على غيره.. الرجالة زي الأتوبيسات واحد عدّى التاني جاي وراه


كمان الرجاله زي الذباب هتهشي واحده هييجي عشرة غيرها

عجبتك ؟طب خدي دي: الرجالة زي المطبات كل ما تفتكري خلصت منهم هتقعي في مطب جديد مش عاملة حسابه

مهما كنتي وحشة متقلقيش فيه اللي أوحش منك وإتجوزوا

بعد الخطوبة
بصي ..عذبيه.. الراجل يحب يتعذب البنت السهلة يدوبك يفكر فيها يومين ويدور على غيرها

إوعي تقوليله بحبك أو عينيك عجباني الراجل ميحبش كده أبدا

لو سألك عرفتي حد قبلي قوليله لا حتى لو كنت مصاحبة رجالة جميع الدول العربيه
لو حاول يوقعك ويقولك بحب الصراحه وكده، برضه خليكي ناصحه أنت عمرك ما عرفتي راجل غير باباكي طبعا

هيقولك هسامحك وده ماضي متصدقيش برضه الرجاله قلبهم أسود وهيمسكهالك ذله العمر كله

بلاش زن ورنات تليفونات ورسايل حب وهيام دول عالم .... مش هيقدر الحاجات دي هيتغر ويفتكر نفسه أحمد عز او ماجد المهندس وهو زي ما إنتي شايفاه قومي بصي لصورته ع الموبايل

خليكي زي فوزية إوعي يمسك إيديكي هيطمع فيكي ويفتكرك واحدة من إياهم ،يرضيكي واحد ملوش لازمة زي ده يفتكرك واحده من إياهم

سيبيه يرغي براحته وعدي الفشر اللي هيفشره والكدب عن البنات اللي دايبين في دباديب سيادته إعملي إنك مصدقاه مع أنك عارفه إنك لولا خايفة لا تبقي عانس مكنتش قبلتي بواحد زيه

خليكي دايما في أحسن صورة هيقولك بحبك تكوني على طبيعتك بحبك من غير ماكياج متعمليش كده لأنه بيتلائم عليكي عاوز يعرف أنتي حلوة فعلا وإلا دي بويه ..خليه على عماه
احنا ما صدقنا انه وقع معاكى